News

Posted On:: Apr, 16 2021
News Images

Waziri wa Habari, Utamaduni, Sanaa na Michezo Mhe. Innocent Bashungwa ameipongeza Taasisi ya British Council kwa kuandaa warsha ya "Namna kijana anavyoweza kutumia ubunifu kujiendeleza kiuchumi".

Mhe.Bashungwa ametoa pongezi hizo leo Aprili 15, 2021 Jijini Dar es Salaam katika warsha iliyoandaliwa na Taasisi hiyo kuhusu ushiriki wa wanawake kwenye masuala ya ubunifu (Woman in Creative Sector).

Hafla hiyo imeshirikisha wadau mbali mbali ikiwa ni pamoja na UNESCO na BASATA na mada kadhaa kuwasilishwa ikiwemo nafasi ya kijana kwenye ubunifu wa kujiendeleza kiuchumi.

"Nimefurahi kufika hapa, kwangu imekuwa ni fursa kubwa maana nimekutana na mwakilishi wa UNESCO, hivi karibuni nilikutana na Balozi wa AU tukafanya mazungumzo juu ya Mfuko wa Wasanii (Artists Trust Fund) ambao katika Bunge hili la Bajeti tumeazimia kuuanzisha na kunauhakika wa kupita kwa asilimia mia, sasa nikuombe kama itawezekana tupange wasaa mzuri ili tukutane na wadau tujue jinsi gani tunapanua Mfuko huu" amesema Mhe.Bashungwa.

Aidha, Mhe.Waziri ameshauri Wadau wa Kimataifa wakiwemo UNESCO kuangalia namna wanavyoweza kutoa mchango wao kusaidia kupanua Mfuko wa Utamaduni na Sanaa unaotarajia pia kuanza Mwaka ujao wa Fedha wa 2020/2021.

Mhe. Bashungwa ametoa onyo kali kwa Wasanii wasiozingatia maadili ya kitanzania na kuwataka kuwa na nidhamu ili kukubalika na hatimaye kuuza kazi zao.